الرئيسية > عيش مصري > دوري الدرجة الثالثة المصري > أحمد نصر : الصدفة سر لعبى الكرة ، اتظلمت فى المصرى ،وطموحى الصعود بالمالية والإحتراف

أحمد نصر : الصدفة سر لعبى الكرة ، اتظلمت فى المصرى ،وطموحى الصعود بالمالية والإحتراف

 

حوار : محمد مصطفى

فى حوار خاص لموقع ” عيش كورة ” مع اللاعب أحمد نصر الدين مهاجم المصرى البورسعيدى والمنصورة سابقاً ، وكابتن فريق مالية كفر الزيات وهداف الفريق برصيد 7 أهداف ، يفتح لنا قلبه ويتحدث عن بداياته مع الكرة ، طموحاته مع مالية كفر الزيات ، والمنافسة هذا الموسم ، وإليكم الحوار :

كلمنا عن بدايات أحمد نصر فى الكرة ؟

_ بدأت من وأنا فى سن ٨ سنوات أخويا الكبير عصام كان ماشي بالصدفة علي بحر بورسعيد وكان فى اختبارات لنادى ، فسأل كانت اختبارات المصري البورسعيدي مع الكابتن محمد ابو العنين ، اشتري ليا استمارة وقمت بالإختبارات ف تانى يوم ، للعلم أن كان أول سن للإختبارات ٩ سنوات لكن الكابتن محمد ابو العنين قام بإختياري علي الفور ليتم قيدى بالفريق و كابتن الفريق من أول أسبوع ، قضيت أسعد أيام حياتى فى المصري من سن ٨ سنوات إلى ٢١ سنة واتصعدت قبل ثورة يناير للفريق الأول بالنادى مع كابتن حسام حسن ثم توقفت الكرة فى مصر بعد حادثة بورسعيد ، وكانت سبب فى تدمير جيلنا بالكامل جيل ال ٩١ ، وقبل الرحيل عن المصرى مضيت عقد مع الفريق الأول وبعد الدوري لما رجع تاني بعد سنتين بدون لعب قرر مجلس الإدراة أنه يضحي بكل جيلنا بعد الإتفاق مع كابتن صبرى المنياوى ، وفعلا مشيت من نادى كنت بحلم فى يوم من الأيام أنى أكون كابتن الفريق .

كان قرار صادم بالنسبة ليك رحيلك من المصرى ؟

_ أكيد ، وقررت ابعد عن مجال الكرة خالص حتى تعاقد معايا كابتن طارق سليمان وهو مدير فني المنصورة .

عرفنا أنك أنضميت لمنتخب مصر للناشئين فترة تواجدك بالمصرى ؟

ف سن ال ١١ سنة منتخب بورسعيد مع الكابتن كيتشى ثم منتخب القناة مع مجموعة من مدربي بورسعيد وإسماعلية والسويس ثم منتخب مصر مع الكابتن ريعو .

 

شايف كان فى ظلم ليك فى رحيلك من المصرى ، خاصة أنك لم تحصل فرصتك مع الفريق ؟

_ طبعاً كل الظلم الأشخاص الذين يديرون النادى علي مر تاريخه لا يحبون ابن البلد وظلمت دون الحكم عليا ف الملعب برغم تصعيدي للفريق الأول من قبلها بفترة ، وظلمت ايضا مع المنصورة .

بعد المنصورة انتقلت للمالية ؟

_  قررت ابعد عن الكرة نهائياً بعد ظلمى فى المنصورة ، قبل ان أنتقل إلى المالية فى الممتاز ب قبل غلق باب القيد بيوم ، ومن هنا الإنطلاقة وانا فى قمة يأسى

نادي انتشلنى من قمة يأسى الي قمة راحتى النفسية من التعامل وغيرها ،
حتي اصبحت كل موسم هداف الفريق وكنت ف منتهى السعادة وانا ألعب لهذا النادي حتي ودون مقابل بس كنت مرتاح نفسياً .
مين المدربين اللى شايف ليهم فضل على احمد نصر ؟
_ أول مدرب اقتنع بيا وأعطى لى كل صلاحياتي فى جميع مراحلي السنية الكابتن محمد ابو العنين في المصرى ، وكل اللى دربونى فى مسيرتى الكروية ليهم فضل كبير عليا كلهم .
تألق كبير لأحمد نصر دايماً ، وعروض أول الموسم تقابل بالرفض دائماً ايه السر ؟

_  أول حاجة راحتى النفسية تغلب دائماً ، أنا مرتاح فى هذا المكان تاني حاجة نفسي أخرج من النادى علي دورى ممتاز وأدخل فلوس للنادي وليس ممتاز ب وده طموحى ، إنما لو هلعب ف أى نادى دورى ممتاز ب والمالية فى الممتاز ب هلعب للمالية .

 

المالية دايماً يبدء الموسم بشكل ممتاز ويتصدر المجموعة ، مع أول تعثر يخرج الفريق برا المنافسة ايه الأسباب من وجهة نظرك؟!

_ والله بيبقي عدم توفيق دائماً وأى توقف بيحصل فى الموسم بيبقى مش فى صالحنا خالص لأن المستوى بينزل مع أول توقف ، لكن السنة دي إن شاء الله ناويين كل النية بعدم التفريط فى الصعود .

 

شايف المنافسة ازاى الموسم ده ، وهل الموسم الحالى اقوى أم الموسم الماضى؟
_ دائماً المجموعة التامنة مشتعلة جداً فى كل موسم بس الموسم ده صعب جداً لتقارب جميع الفرق من بعض فى المستويات وف النقاط .
مين من الفرق كان مفاجأة المجموعة من وجهة نظر أحمد نصر ؟
_ اكيد بالنتائج الفترة الأخيرة عرب الرمل لكن  جميع فرق المجموعة قوية حداً ومحترمة جميعهم من الاول للأخير .
مين يقدر يكمل فى المنافسة للأخر ، وشايف الصعود هيحسم بدرى ولا هيستمر للجولات الأخيرة ؟
_ هيستمر للجولات الأخيرة ما بين المالية وبنها وسمنود والصيد وطوخ .
عرب الرمل هيبعد رغم وضعه الحالى فى الجدول وتصدره المجموعة ؟
_ أتوقع لأن هيقابل كل الفرق المنافسة خارج ملعبه تقريباً ، لكن ايضا كل شيء وارد وهما فريق كبير .
أصعب مباراة شاركت فيها هذا الموسم مع المالية كانت مين ؟
_ والله كل المباريات بس أكتر فريقين منظمين قابلناهم بنها وسرس الليان مع احترامي لجميع الفرق .
طموحاتك هذا الموسم مع المالية ، وطموح أحمد نصر الشخصى ؟
_ الطموح مع الفريق الصعود بالمالية لوضعها الطبيعى ، وطموحى الشخصى السفر الخارجي او اللعب للدوري الممتاز .
احمد نصر عينه على هداف المجموعة خاصة أنك فى المنافسة على لقب الهداف ؟
_ لا خالص والله عيني فقط علي الصعود مع المالية ان شاء الله .
شايف مشكلة المستحقات المتأخرة كانت من أسباب هزيمة عثماسون المفاجئة ؟

_ لا لا الأمور المادية ضرورية جداً لفريق عايز يصعد ، والمشكلة علي وشك الحل إن شاء الله إنما اظنها عدم توفيق ف الملعب فقط .

 

مثلك الأعلى محلياً وعالمياً ؟
_ محلياً عبد الحليم على مهاجم الزمالك السابق ، عالمياً ابراهيموفيتش .
اذكى لاعب لعبت معاه ؟
_ كتير والله ومواهب كتير بس بقالي فترة كبيرة بلعب وأحب لعب محمود شهاب ومحمود حشيش وهم مشاركين ف صناعة معظم أهدافى مع المالية .
تم اختيارك فى منتخب المجموعة وشاركت فى مباراة قمة التالتة ، رايك فى التجربة والمشاركة ، ورأيك فى فكرة المباراة ؟
_ تجربة فوق الممتازة وأجواء فوق الرائعة أتمنى تكرارها مع جميع المجموعات وكل فترة توقف والإختيارات جميعها لاعيبة ممتازة تستاهل كل خير ومدربين محترمين ومنظمين مجتهدين دون مقابل تجربة فعلا تحترم جداً ، وكان شرف كبير ليا سواء بأن أكون كابتن المنتخب أو حتى إختياري مع المنتخب .

لو قولنا وجه 3 رسائل أو نصائح أو عتاب أو شكر للاعب ومدير فنى وشخص خارج مجال الكرة هتختار مين ؟

عتاب لا يوجد رسائل لأخواتى وأمى وزوجتى اللي من غير دعمهم كنت بطلت كورة من زمان جداً ، واقرب اصدقائي اكيد دائماً سند ليا ، وأيضا اشكر اى مدير فني اتدربت تحت قيادته فى مسيرتي لأنى اتعلمت من سواء ككورة او تعامل حتى لو بعضهم ظلمني بس استفدت منه ايضاً ، وأمنيتى اشوف كل زمايلى اللي فى الملعب فى احسن أماكن يليقوا بيهم لأن اكترهم موهوبين .

 

رابط مختصر:

شاهد أيضاً

فوز المالية ، هزيمة سبورتنج كاسل ، و بنها وطوخ حبايب

كتب : محمد مصطفى انتهت منذ قليل مباريات الجولة التاسعة من دورى القسم الثالث المجموعة …